{ முகநூல் கருத்துக்கள்}{ட்விட்டர் கருத்துக்கள்}

காயல்பட்டினம் இரண்டாவது பைப்லைன் குடிநீர் திட்டத்திற்கான பணி ஆணை நகராட்சியால் நேற்று வழங்கப்பட்டுள்ளது. விபரம் வருமாறு:-

காயல்பட்டினத்திற்கான வரலாற்று சிறப்புமிக்க புதிய குடிநீர் திட்டப்பணிகளை துவக்கிட பணி ஆணையை (WORK ORDER) - 07.01.2013 திங்கட்கிழமையன்று, இப்பணிகளுக்கான ஒப்பந்ததாரரான - சென்னையைச் சார்ந்த Shriram EPC Ltd என்ற நிறுவனத்தின் துணைப்பொது மேலாளர் - காதர் நவாஸ் கானிடம் காயல்பட்டினம் நகராட்சி ஆணையர் ஜி.அஷோக் குமார் வழங்கினார்.





காயல்பட்டினம் நகர்மன்ற உறுப்பினர்களான எம்.ஜஹாங்கீர், ஜெ.அந்தோணி, ஏ.ஹைரிய்யா, எஸ்.எம்.பி.பத்ருல் ஹக், எம்.எஸ்.எம்.ஷம்சுத்தீன், பாக்கியஷீலா, எஸ்.எம்.சாமு ஷிஹாப்தீன், ஏ.ஏ.அபூபக்கர் அஜ்வாத், இ.எம்.சாமி, நகராட்சி குடிநீர் வினியோகக் குழாய் பொருத்துநர் நிஸார், நகராட்சி பணி மேற்பார்வையாளர் செல்வமணி ஆகியோர் இந்நிகழ்வின்போது உடனிருந்தனர்.

இந்நிகழ்வின் வீடியோ ஒளிப்பதிவைக் காண இங்கே சொடுக்குக!

முன்னதாக இதற்கான ஒப்பந்தத்தில் காயல்பட்டினம் நகராட்சியின் சார்பாக, ஆணையர் ஜி.அஷோக் குமார் மற்றும் ஒப்பந்த நிறுவனத்தின் சார்பாக அதன் துணைப்பொது மேலாளர் காதர் நவாஸ் கான் ஆகியோர் கைச்சான்றிட்டனர்.

அவ்வேளையில் - பணிகள் அனைத்தையும் மே 2014க்குள் முடித்திட உறுதி அளித்த Shriram EPC Ltd நிறுவனத்தின் துணை மேலாளர் உறுதி அளித்தார். மேலும் - நகர்மன்றத் தலைவர் ஐ.ஆபிதா ஷேக் கோரிய படி, இத்திட்டப் பணிகளின் துவக்கப் பணியாக நகரினுள் குடிநீர் விநியோக முறையை புதிதாக அமைத்திட முன்னுரிமை வழங்கி ஆய்வுகள் மேற்கொள்ளப்படும் எனவும் அவர் தெரிவித்தார். இந்த திட்டம் மத்திய அரசின் UIDSSMT (Urban Infrastructure Development Scheme for Small and Medium Towns) திட்டத்தின் கீழ் செயல்படுத்தப்படவுள்ளது. மொத்த திட்டத் தொகையில் 80 சதவீதம் மத்திய அரசும், 10 சதவீதம் மாநில அரசும், 10 சதவீதம் காயல்பட்டினம் நகராட்சியும் பங்களிக்கும். அதன்படி காயல்பட்டினம் நகராட்சியின் பங்கு சுமார் 3 கோடி ரூபாய் இருக்கும். திட்டம் துவக்கப்பட்டு 18 மாதங்களுக்குள் (மழை காலங்களையும் சேர்த்து) நிறைவு செய்யப்படவேண்டும்.

சுமார் 28 கோடியே, 30 லட்சத்து, 82 ஆயிரம் ரூபாய் மதிப்பீட்டில் செயல்படுத்தத் திட்டமிடப்பட்டுள்ள இப்பணிகளுக்கான டெண்டர் அறிவிப்பு ஜூலை 28 அன்று நாடு முழுவதும் - தி இந்தியன் எக்ஸ்பிரஸ் நாளிதழிலும், தமிழகம் முழுவதும் தின மலர் நாளிதழிலும் வெளியிடப்பட்டது. இ-டெண்டர் முறையில் வெளியிடப்பட்டு, ஆவணங்களை ஆகஸ்ட் 01 முதல் செப்டம்பர் 03 வரை - இலவசமாக பதிவிறக்கம் செய்யலாம் என அறிவிக்கப்பட்டிருந்தது. ஒப்பந்தப்புள்ளிகள் திறப்பதற்கு முன்னர் விளக்க கூட்டம் (Pre-Bid Meeting) ஆகஸ்ட் 23 அன்று காயல்பட்டினம் நகராட்சியில் நடைபெற்றது.

செப்டம்பர் 04 அன்று காயல்பட்டினம் நகராட்சியில் - ஒப்பந்தப் புள்ளிகள், ஒப்பந்ததாரர்கள் முன்னிலையில் திறக்கப்பட்டது. சென்னையைச் சார்ந்த Shriram EPC Limited மற்றும் ஆந்திர மாநிலம் ஹைதராபாத்தை சார்ந்த Megha Engineering and Infrastructure Limited. இரண்டு நிறுவனங்கள் ஒப்பந்தப் புள்ளிகளை சமர்ப்பித்திருந்தனர்.

இவ்விரு நிறுவனங்களில் குறைந்த ஒப்பந்தப் புள்ளி சமர்ப்பித்த Shriram EPC Ltd நிறுவனத்தின் தொகை - மதிப்பீட்டு தொகையை விட 10 சதவீதத்திற்கும் கூடுதலாக இருந்ததால், சென்னையில் உள்ள நகராட்சி நிர்வாகத்துறை இதுகுறித்த பேச்சுவார்த்தையை அந்நிறுவனத்துடன் நடத்தியது. அதன் பிறகு அந்நிறுவனத்தால் மீண்டும் சமர்ப்பிக்கப்பட்ட ஒப்பந்தப் புள்ளி, மதிப்பீடு அளவை விட 10 சதவீதற்கு சற்று குறைவாக இருந்தது.

அரசு விதிகளின் படி, மதிப்பீட்டு தொகையை விட 5 சதவீதத்திற்கு கூடுதலான ஒப்பந்தப் புள்ளிகளுக்கு மட்டுமே நகராட்சியால் ஒப்பந்தம் வழங்க முடியும். 5 முதல் 10 சதவீதம் வரை கூடுதலான ஒப்பந்தப்புள்ளிகள், உயர் அதிகாரிகள் அடங்கிய Tender Award Committee மூலமே அனுமதி வழங்கப்படவேண்டும்.

கடந்த சில நாட்களுக்கு முன், இது குறித்து சென்னையில் கூடிய Tender Award Committee, Shriram EPC Ltd நிறுவனத்தின் ஒப்பந்தப் புள்ளியை ஏற்றுள்ளது. அதன் தொடர்ச்சியாக அந்நிறுவனம், பாதுகாப்புத் தொகையை சமர்ப்பித்துள்ளதையடுத்து தற்போது ஒப்பந்தம் கைச்சான்றிடப்பட்டு பணிகள் துவக்கப்படவுள்ளன.

[கிழமை திருத்தப்பட்டுள்ளது @ 10:52 / 08.01.2013]