IP: 180.*.*.* India

காஸ் சிலிண்டர் மட்டுமல்ல. எல்லா மானியங்களும் ஏழைகளை முன்வைத்தே அவர்கள் ஏழ்மை நிலையை நினைத்தே உருவாக்கப்படுகிறது. ஆனால் வசதி படைத்தவர்கள் எல்லோரும் அந்த மானியத்தைப் பெற்றுக் கொள்ள ஆசைப் படுகிறோம்.

உனக்கு என்னப்பா, நல்ல வசதியாக வாழ்கிறாய் என்று ஒரு சராசரி வசதிகளுடன் வாழ்பவன் இடம் சொல்லிப் பாருங்கள். அல்ஹம்து லில்லாஹ் என்று சொல்ல மாட்டான்.உடனே அவன் கொதித்து எழுந்து பேசுவான். எனக்கு எத்தனை பெண்பிள்ளைகள் தெரியுமா என் வீட்டை பார் அவன் வீட்டை பார். அவனை பார் இவனை பார் அவர்களெல்லாம் உன் கண்ணுக்கு தெரியவில்லையா என்பான்.

ஒரு நிகழ்ச்சி எனக்கு ஞாபகம் வருகிறது. தமிழ் நாட்டில் வெள்ளம். அன்றைய முதல்வர் ஒரு அறிக்கை விடுகிறார். வெள்ளம் ஏற்பட்ட பகுதியில் வாழ்பவர்களுக்கு நிவாரணமாக 1000/- பெற்றுக் கொள்ளலாம். உங்கள் வீட்டு கூப்பனைக் காட்டி தாலுகா அலுவலகத்தில் அந்த ரூபாயை பெற்றுக் கொள்ளுங்கள். இந்த அறிக்கையை பார்த்தவுடன் தாலுகா அலுவலகங்களில் கூட்டம் அலை மோதுகிறது. பண வசதி படைத்தவர்களும் அவர்கள் கூப்பன்களை கொடுத்து அந்த சலுகையை பெற்றுக் கொள்கிறார்கள். ஒரு இடத்தில கூட்ட நெரிசலில் ஒருவர் இறந்து விடுகிறார், இன்னும் சிலர் படு காயமுற்று மருத்துவமனையில் அனுமதிக்கப் பட்டுள்ளார்கள். இப்போது முதலமைச்சர் அந்த மருத்துவமனையில் இருப்பவர்களுக்கு ஆறுதல் சொல்ல போகிறார். இந்த படுகாயமுற்றவர்களை நலம் விசாரிக்கும் முதலமைச்சர் இவர்களிடம் கேட்கிறார், நீங்கள் வசதி இல்லாதவர்களா, நீங்கள் ஏன் அந்த கூட்டத்துக்கு போனீர்கள், அந்த சலுகை உங்களுக்கு உள்ளதில்லையே, வெள்ளத்தில் அகப்பட்டு வேதனைப் படும் ஏழைகளுக்கு தானே நான் அந்த சலுகையை அறிவித்தேன். 1000 ரூபாய்க்கு பதிலாக எத்தனை ஆயிரம் நீங்கள் செலவழிக்க வேண்டி வந்து விட்டது, கடவுள் தந்ததற்கு நீங்கள் கடவுளுக்கு நன்றி சொல்லவேண்டாமா என்று ஒரு நீண்ட பிரசங்கமே செய்து முடித்து விட்டு வெளியே வந்தார் முதல்வர். முதலமைச்சர் அறிவித்தது கூட அவரது சுயநலம்தான். மக்களிடம் இதை சொல்லி அடுத்த தேர்தலில் ஒட்டு கேட்க முடியும் என்பது வேறு விஷயம். அவரவர்களுக்கு ஒரு மன சாட்சி உண்டு.

நபிகள் நாயகம் மிக சுருக்கமாக தெளிவாக சொன்னார்கள். ஒரு செயலை நான் செய்யும் போது அது தவறா சரியா என்று எப்படி தெரிந்து கொள்வது என்று நபி தோழர் ஒருவர் கேட்டார். நீ ஒரு செயலை செய்யும்போது அதை மற்றவர்கள் பார்த்து விடக் கூடாது என்று ஒளிவு மறைவாக செய்ய நீ நினைத்தால், அந்த செயல் தவறு என்று விளங்கி கொள். ஒரு செயலை செய்ய முற்படும்போது உனது மன சாட்சி நீ செய்வது தவறு என்று உன்னை உறுத்தினால் அது தவறு என்று தெரிந்து அதிலிருந்து விலகி கொள். இது மார்க்க விஷயம் என்பது மட்டுமல்ல, உலகில் அன்றாட நாம் சந்திக்கும் எல்லா விஷயங்களுக்கும் பொருந்தும்.

அரசு மட்டும் நேர்மையாக நடக்கிறதா என்று குறுக்கு கேள்வி கேட்டு நம்மை நாமே ஏமாற்றிக் கொள்ளக் கூடாது. நான் செய்யும் தவறுக்கு நான் மட்டுமே பொறுப்பாளி , மற்றவர்களை குறை கூறி நான் அந்த பொறுப்பிலிருந்து நீங்கி விட முடியாது என்ற உண்மையை எல்லோரும் நினைத்து செயல்பட்டால் - மானியம் - சூனியம் எதுவும் நம்மை ஒன்றும் செய்யாது.

இப்படி, நேர்மையாக - பொது வாழ்வில் தூய்மையாக வாழும் வாழ்க்கையை எல்லாம் வல்ல அல்லாஹ் நம் எல்லோருக்கும் நசீபாக்கி வைப்பானாக ஆமீன்.